મને એ જ સમજાતું નથી... - કરસનદાસ માણેક

મને એ જ સમજાતું નથી કે આવું શાને થાય છે,

ફૂલડાં ડૂબી જતાં ને પથ્થરો તરી જાય છે.

ટળવળે તરસ્યાં ત્યાં જે વાદળી વેરણ બને,

તે જ રણમાં ધૂમ મુશળધાર વરસી જાય છે.

ઘર-હીણાં ઘૂમે હજારો ઠોકરાતાં ઠેર-ઠેર,

ને ગગનચુંબી મહાલો જનસૂના રહી જાય છે.

દેવડીએ દંડ પામે ચોર મૂઠી જારના,

લાખ ખાંડી લૂંટનારા મહેફિલે મંડાય છે.

કામધેનુને મળે ના એક સૂકું તણખલું,

ને લીલાંછમ ખેતરો સૌ આખલા ચરી જાય છે.

છે ગરીબોના કૂબામાં તેલ ટીપુંય દોહ્યલું,

ને શ્રીમંતોની કબર પર ઘીના દીવા થાય છે!